Kinyarwanda
English
RDC: Ebola ikomeje gukaza umurego.
Minisiteri y’Ubuzima muri Repubulika Iharanira Demokarasi ya Congo yatangaje ko kugeza ku wa 6 Kamena 2026, abo byemejwe ko banduye Ebola bageze kuri 515 barimo 91 bamaze gupfa.
Ku wa 7 Kamena, nibwo Minisiteri y'Ubuzima yasobanuye ko uturere 25 two mu Burasirazuba bw’Igihugu ari two tumaze kugaragaramo iki cyorezo, Intara ya Ituri ikaba ari yo icyiganjemo ubwandu bwinshi aho yihariye hafi 94% by’ubwandu bwose buri mu Gihugu.
Mu bantu barwaye Ebola, 283 muri bo baracyari mu kato, aho bitabwaho bya hafi n’abaganga. Iyi Minisiteri yatangaje ko abantu 12 bamaze gukira, barimo batatu bashya bo mu Mujyi wa Bunia na Santere ya Katwa.
Leta ya Repubulika Iharanira Demokarasi ya Congo ivuga ko impamvu imibare y’abanduye Ebola n’abayikize itinda gutangazwa, ari uko ibipimo babivana mu Burasirazuba bw’iki Gihugu, bakajya kubipimira muri Laboratoire i Kinshasa.
Isesengura ryakozwe rigaragaza ko Ebola ya Bundibugyo iri kwica ku kigero cya 17,7%. Nta muti cyangwa urukingo ifite ariko abaganga bavura ibimenyetso byayo, amahirwe yo gukira akiyongera iyo umurwayi yivuje kare.
Minisiteri y’Ubuzima yo muri Uganda yo yatangaje ko kugeza ku wa 7 Kamena, abantu 19 ari bo bamaze kwandura Ebola ya Bundibugyo i Kampala, 14 muri bo bakaba barayikuye muri RDC, abandi batanu banduzwa na bo.
Mu banduye Ebola muri Uganda, babiri baturutse muri RDC barapfuye, hakira bane. Abandi 13 baracyari mu kato mu bitaro by’i Kampala, aho bari gukurikiranirwa hafi n’abaganga.
Gilbert NIYOMUKIZA.
