Nyamagabe: Abayobozi b’ishyaka ‘Green Party’ basabwe kwirinda ubusinzi no kwiyandarika

Ubuyobozi bukuru bw’Ishyaka Riharanira Demokarasi no Kurengera Ibidukikije mu Rwanda (DGPR Green Party), bwahuguye abagize inzego z’ubuyobozi bw’ishyaka mu Karere ka Nyamagabe, bubasaba kurangwa n’imyitwarire myiza, birinda ubusinzi no kwiyandarika, kuko ari byo bizatuma barushaho kubona umubare munini w’abarwanashyaka.

Mar 30, 2026 - 16:35

Nyamagabe: Abayobozi b’ishyaka ‘Green Party’ basabwe kwirinda ubusinzi no kwiyandarika

Komiseri Mukuru muri DGPR Green Party, Mugisha Alexis n'abarwanashyaka b' i Nyamagabe

Ibi ni bimwe mu byagarutsweho ku wa 22 Werurwe 2026, mu mahugurwa yahawe komite zatowe mu Karere ka Nyamagabe, hagamijwe kububakira ubushobozi mu bumenyi ku ishyaka muri rusange.

Ubusanzwe, komite y’Akarere iba igizwe n’abantu 33 barimo Komite nyobozi y’akarere y’abantu 11 ndetse n’izindi komite ebyiri nazo zigizwe n’abantu 11 buri yose ku cyiciro cy’urugaga rw’urubyiruko ndetse no ku cyiciro cy’urugaga rw’abagore.

Mu biganiro bahawe, Komiseri Mukuru muri DGPR Green Party, Mugisha Alexis, yerekanye indagagaciro zikwiye kuranga umurwanashyaka nyawe wa DGPR, ndetse banibutswa ko uko bitwara muri sosiyete ari byo bizatuma abarwanashyaka bashya babiyungaho.

Ati :“Turashaka ko mugira ubumenyi buhamye, bityo muzabashe kujya gushaka abarwanashyaka mu mirenge itandukanye, ari nabo bazatorwamo abayobozi mu nzego z’umurenge. Tubakeneyeho kwihesha agaciro no gukora cyane, kugira ngo ibyo mukora byose ntibiherekezwe n’ubukene, ahubwo imirimo yose dokorera ishyaka, tuyikore tutarira tutanashonje, ahubwo twishimiye igihugu cyacu.”

Mugisha yakomeje asaba aba bayobozi kugira imico myiza, kuko ari byo bizatuma bunguka abarwanashyaka bashya benshi ba DGPR Green Party.

Ati: “Mwiheshe agaciro mu buryo bwo kugira ikinyabupfura, mugira isuku, mudasebya abo mu yandi mashyaka, mwirinda ibyaha, gusinda, kwiyandarika, kuko ibyo bizatuma n’abandi babayoboka.”

Umwe mu barwanashyaka ba DGPR witwa Kubushake, wo mu Karere ka Nyamagabe, Umurenge wa Gasaka, yavuze ko mu mwaka umwe amaze abaye umurwanashyaka, iri shyaka rimaze kumuremamo icyizere ndetse rimwereka inzira y’iterambere izira ibiyobyabwenge, agahamya ko azakomeza kuribera inkoramutima anarishakira abarwanashyaka bashya.

Ati: ‘‘Iri ni ishyaka rishaka kuduteza imbere nk’urubyiruko. Nzabibwira n’abandi, mbasabe kuza mu ishyaka, mbibutse ko ari ishyaka rirengera ibidukikije, ari nabyo bishimangira ko ryifuza ejo heza h’urubyiruko.”

Hitiyaremye Espérance, Perezida wa Komite Nyobozi y’iri shyaka mu Karere ka Nyamagabe, yavuze ko impanuro yaherewe muri DGPR ari nazo bazitwaza bagiye gushaka abarwanashyaka bashya kandi bumva bazababona benshi hirya no hino mu mirenge, kuko imigambi y’ishyaka ryabo abona itajegajega.

Ati: “Batubwira ko nutema igiti kimwe utera 20, batwigisha gukora imishinga y’iterambere, baradutinyuye tubasha kugana amabanki, ndetse tugera n’aho abantu bari, ubu tubasha kuvugira mu nama ibitubangamiye n’ibitunejeje. Nzereka abarwanashyaka bashya ngiye gushaka ibyo byiza twagezeho, maze mbasabe ko dukomezanya.”

Iki gikorwa cyahereye mu turere dutanu tw’Intara y’Amajyaruguru, cyakomereje mu Majyepfo, gihereye mu Karere ka Nyaruguru, yakurikiwe na Nyamagabe, kikazakomeza no mu tundi turere, nyuma abahuguwe bakazajya gushinga izindi komite mu mirenge.