Senegal: Senegal yabonye Minisitiri w’Intebe mushya.

Nk’uko byatangajwe kuri televiziyo y’igihugu, Ahmadou Al Aminou Lo wahoze ari umuyobozi mu Banki Nkuru y’Ibihugu byo muri Afurika y’Iburengerazuba (BCEAO), ni we wagizwe Minisitiri w’Intebe mushya, asimbuye Ousmane Sonko.

Nk’uko tubikesha ikinyamakuru (AP), mu itangazo ryasomewe kuri televiziyo y’igihugu, Perezida Faye yatangaje ko Ahmadou Lo agiye gusimbura Ousmane Sonko ku mwanya wa Minisitiri w’Intebe.

Izi mpinduka zije mu gihe Senegal iri guhangana n’ibibazo bikomeye birimo umwenda munini wa Leta ndetse n’umwuka mubi uri hagati y’abayobozi b’ishyaka riri ku butegetsi.

Sonko yirukanwe ku wa gatanu ushize nyuma y’amezi menshi havugwa ubushyamirane n’ukutumvikana hagati ye na Perezida Faye, icyo cyemezo gihita gikurikirwa no kwegura kw’abagize Guverinoma bose no kuyisesa.

Lo mu byo ashinzwe ubu, harimo no gushyiraho Guverinoma nshya. Ahmadou Al Aminou Lo yahoze ari umwe mu bayobozi bakuru muri Banki Nkuru y’Ibihugu byo muri Afurika y’Iburengerazuba (BCEAO), aho yagize uruhare rukomeye mu igenamigambi rya politiki y’ifaranga n’ubukungu ku rwego rw’akarere.

Gilbert NIYOMUKIZA