Gicumbi: Hatangijwe umushinga w’ubworozi bw’ingurube uzagera ku miryango irenga 100 mu myaka 2.

Mu Karere ka Gicumbi, Ishyaka Riharanira Demokarasi no Kurengera Ibidukikije ( green Party of Rwanda), ryatangije umushinga wo koroza Abarwanashyaka baryo amatungo magufi.Uyu mushinga ugamije guteza imbere imibereho y’abaturage no kongera umusaruro w’ubworozi by’umwihariko mu bice by’icyaro.

Apr 26, 2026 - 13:16

Apr 26, 2026 - 14:18

Gicumbi: Hatangijwe umushinga w’ubworozi bw’ingurube uzagera ku miryango irenga 100 mu myaka 2.

Bamwe mu borojwe ingurube na Green Party ku ikubitiro

Ni umushinga watangirijwe mu karere ka Gicumbi tariki ya 24 Mata 2026 utangizwa n’ishyaka DGPR Green Party, mu rwego rwo gushyigikira gahunda zigamije iterambere rirambye no kurengera ibidukikije binyuze mu bikorwa bifasha abaturage kwiteza imbere.

Ku ikubitiro, abarwanashyaka baryo bagera kuri batandatu ni bo borojwe ingurube. Aba barwanashyaka bahawe inshingano zo kuzitaho neza, bakazibyaza umusaruro, hanyuma bakazoroza bagenzi babo, bityo umushinga ugakomeza kwaguka gahoro gahoro ukagera ku bantu benshi mu karere.

Green Party yateguye iki gikorwa igaragaza ko ari imwe mu ngamba zigamije guhanga imirimo, kongera amikoro yinjira mu miryango no guteza imbere ubukungu bw’icyaro. Banasobanura ko ubworozi bw’ingurube bwatoranyijwe kubera ko bwororoka mu gihe gito, bukaba bwafasha abaturage kubona inyungu vuba ugereranyije n’andi matungo.

Ikindi ni uko uyu mushinga uhuza n’intego z’iri shyaka yo kurengera ibidukikije, kuko uteza imbere gahunda yo kubungabunga ibidukikije ndetse no guhangana n'ingaruka z'imihindagurikire y'ibihe.

Ku ruhande rw'aborojwe aya matungo, bavuga ko bishimiye aya mahirwe bahawe, bakemeza ko azabafasha kwiteza imbere no kuzamura imibereho yabo ndetse n’iy’imiryango yabo. Bavuga ko bazashyira imbaraga mu kuyitaho neza kugira ngo nabo bazabone uko boroza abandi, bityo n’abandi bagahabwa amahirwe nk’ayo.

Ubuyobozi bwa Green Party buvuga ko abaturage 6 bahawe ingurube ku ikubitiro ari bo bazabimburira bagenzi babo, nibura imiryango irenga 30 mu mwaka wa mbere, mu gihe mu myaka 2 iri imbere biteganyijwe ko bazaba bamaze koroza imiryango irenga 100. Bagaragaza kandi ko ingurube imwe ishobora kubyara hagati y’utwana 8 na 12, bigatanga icyizere ko mu gihe cy’amezi 6–12 gusa umushinga ushobora kwaguka ku kigero kiri hejuru. Ibi bikaba biteganyijwe kuzamura umusaruro w’ubworozi ku kigero kirenga 40%, no kongera amikoro y’ingo ku kigero kiri hejuru ya 50%, bityo bikagira uruhare rukomeye mu kugabanya ubukene no guteza imbere iterambere rirambye mu karere ka Gicumbi.