Kinyarwanda
English
RWANDA: Sunrise FC na Unity FC zazamutse mu Kicyiro cya mbere.
Ikipe ya Sunrise FC n’ikipe ya Unity FC ni zo zamaze kuzamuka mu cyiciro cya mbere cya BK pro League muri uyu mwaka, nyuma yo kwitwara neza mu mikino ya "play-offs" y'Icyiciro cya Kabiri.
Amakipe yombi yabigezeho nyuma yo kwitwara neza mu mikino ya nyuma isoza Shampiyona y’uyu mwaka w’imikino wa 2025/26 yakinwe kuri uyu wa Gatandatu, tariki ya 16 Gicurasi 2026. Kuri Stade ya Ngoma, Sunrise FC yari yakiriwe na Etoile de l’Est yari imbere y’abakunzi bayo benshi. Kuba Etoile de l’Est yari imbere y’abafana bayo i Ngoma ntibyakanze Ikipe ya Sunrise kuko yahakuye itsinzi 2:1 maze Etoile de l’Est ikaba igumye mu kicyiro cya Kabiri.
Itsinzi Sunrise yakuye i Ngoma, yayitahanye n’Igikombe cya Shampiyona y’Icyiciro cya Kabiri n’amanota 13 mu mikino ya Kamarampaka, ndetse izamuka mu Cyiciro cya Mbere yaherukagamo mu 2024.
Iyi kipe y’i Nyagatare izamukanye na Unity FC yagize amanota 10 nyuma yo kunganya n’Intare FC ubusa ku busa. Unity FC yo ni ku nshuro ya mbere igiye gukina Icyiciro cya Mbere.
Ikipe ya Sunrise FC yatsinze inegukana igikombe ari iya mbere, ihabwa sheki ya miliyoni 25 Frw, Unity FC yabaye iya kabiri ibona miliyoni 20 Frw. Mu Cyiciro cya Kabiri hahembwe amakipe umunani ya mbere, yose hamwe agabana miliyoni 105 Frw.
Ubu hategerejwe amakipe azasimburwa n’aya akamanuka mu Kicyiro cya Kabiri, aho kuri ubu amakipe ari mu murongo utukura ashobora kuzamanukayo ari Muhanga Fc ndetse na Rutsiro Fc, mu gihe zaba zikomeje kwitwara nabi.
MANIRAKIZA Theoneste.
