Drake yaciye agahigo kari gafitwe na Michael Jackson.

Umuraperi Drake yamaze guca agahigo kari gafitwe na Michael Jackson, ko kugira indirimbo nyinshi zabaye iza mbere ku rutonde rwa Billboard Hot 100 mu bahanzi b’abagabo bakora ku giti cyabo, nyuma y’uko “Janice STFU” ihise ifata umwanya wa mbere nyuma yo gushyira hanze album eshatu zikurikiranya.

Nyuma y’iyo ntsinzi, Drake yahise anganya na Rihanna na Taylor Swift mu kugira indirimbo 14 zose zafashe umwanya wa mbere kuri Billboard Hot 100. Abahanzi bonyine babarusha ni Mariah Carey ufite indirimbo 19 zabaye iza mbere, ndetse n’itsinda rya The Beatles rifite 20.

Byongeye kandi, Drake yaciye agahigo kari gafitwe na Morgan Wallen kuva mu 2025 ko kugira indirimbo nyinshi zinjiye icyarimwe ku rutonde rwa Billboard Hot 100 mu cyumweru kimwe, aho Drake yinjije indirimbo 42.

Mbere yaho, Morgan Wallen yari yarinjije indirimbo 37 mu cyumweru kimwe, akaba yari aciye agahigo ke bwite k’indirimbo 36 yari yarashyizeho mbere. Wallen kandi yari yanganyije na Taylor Swift ku mwanya wa gatatu w’abahanzi bafite indirimbo nyinshi zinjiye rimwe kuri urwo rutonde, aho bombi bagejeje indirimbo 32 kuri Hot 100 mu 2025 no mu 2024.

Ku rundi ruhande, agahigo ka mbere ka Drake ko kugira indirimbo nyinshi zinjiye ku rutonde mu cyumweru kimwe kari mu 2018, ubwo yari yinjije indirimbo 27.

Mu ndirimbo 10 za mbere kuri Billboard Hot 100, Drake yigaruriye imyanya icyenda yose, hasigara gusa indirimbo “Choosin’ Texas” ya Ella Langley iri ku mwanya wa gatanu.

Ibi byatumye Drake yongera agahigo ke ko kugira indirimbo 90 zimaze kugera muri Top 10 mu rugendo rwe rwa muzika, ndetse umuhanzi wa mbere mu mateka ugejeje ku ndirimbo zirenga 400 zimaze kwinjira kuri Billboard Hot 100.

Gilbert NIYOMUKIZA